Terrorherrschaft

D Terrorherrschaft, d Schreckensherrschaft oder dr Schrecke (franzöösisch la Terreur ‚dr Schrecke‘) isch e Periode in dr Französische Revoluzion gsi, wo vo Aafang Juni 1793 bis Ändi Juli 1794 duurt het und wo alli Persone brutal underdruckt worde si, wo im Verdacht gstande si, ass si nit mit dr Revoluzion iiverstande sige. D Terrorherrschaft isch vom Woolfaartsusschuss, eme Komitee vo zwölf Manne, gläitet worde. Zerst isch er vom Georges Danton aagfüert worde und denn mee und mee vom Maximilien de Robespierre.

D Terrorherrschaft het mit em Ufstand vo de Bariiser Sansculotte gegen e Konvänt vom 31. Mai bis 2. Juni 1793 aagfange und dr Aanaam vo dr Verfassig vom 24. Juni 1793, wo allerdings nie in Chraft dräte isch. Iire Höhepunkt isch im Juni und Juli 1794 gsi; die Zit wird au as Groosse Terror (frz. la Grande Terreur) bezäichnet. Si isch über gsi, wo dr Robespierre verhafdet und hiigrichdet worde isch und d Thermidorianer am 9. Thermidor II (27. Juli 1794) d Macht übernoo häi.

In dr Zit vo dr Terrorherrschaft si öbbe 21'000 „Überwachigsusschüss“ bildet und 35'000 bis 40'000 Lüt umbrocht worde, weniger as d Helfti si vom ene Gricht verurdäilt worde und 85 Brozänt vo de Opfer si äifachi Bürger gsi, wo im Ancien Regime zum Dritte Stand zelt häi.